حوار مع عربجى

فى أثناء سيرى فى الطريق شعرت ببعض الإرهاق فقررت أن أستريح تحت شجرة على كورنيش النيل  وبعد دقائق جلس شخص بجانبى  يبدو على مظهرة وملابسه وعمامته  المهلهله إلى حد ما أن معيشته صعبه للغايه ,,أخرجت علبه سجائرى لأشعل سيجارة وإذا به يقول لى ,,هات سيجارة يا أستاذ فأعطيته سيجارة وأشعلها سريعآ ثم تنهد وقال :-إييييييييييييييييييييييييييييييييه مصر دى مش بتاعتنا يا أستاذ. فتبسمت وقولت له يا راجل إستهدى بالله أوومال بتاعه مين .قال لا دى بتاعه شويه ناس واللى زى حالاتى شغال عندهم وخلاص قولت له يعنى إنت مش زعلان على الأحداث اللى بتمر بيها مصر اليومين دول .فقال هو أنا فيا دماغ أعرف هو إيه  اللى بيحصل فى مصر لما هزعل عليه ,إنشالله تتحرق باللى فيها فقولت له ,إنت شغال إيه .وإستطرد قائلآ أنا عندى 48سنه ومتجوز وعندى 6عيال منهم إتنين تعبانين بثقب فى القلب ومراتى عندها جلطه فى المخ وجريت كتير من مستشفى لتأمين صحى لمكتب فلان لبيت علان عشان أعالجهم على نفقه الدوله وفى الأخر صرفولى صنفين إتنين من العلاج لكل واحد علبتين فى الشهر وقالولى العمليه بتاعتهم محتاجه قرار وزير الصحه وشوف حد يوصلك له وعشان هما محتاجين علاج كتير بعت العربيه الكارو بالحصان وقعدت عى فيض الكريم  أشيل  لدة شويه عفش أو رمل أو طوب والصحه مش مستحمله كمان  ,وبالرغم من كل هذا أخرجت له نقود وألححت عليه أن يقبلها وحتى على سبيل السلف فرفض وبكى قائلآ :-أنا بفضفض معاك يا أستاذ مش بشحت منك يعنى دول لو ولاد ناس من اللى فى الحكومه كان زمانهم عملوا معاهم كدة ,قولتله لأ .قالى عشان كدة بقولك مصر مش بتاعتنا دى بتاعه ناس تانيين خالص مهماش فقرا ولا غلابه بس ربنا كبير ,,,ومشى بعيدآ عنى يكلم نفسه ويناجى الله ,,ولذلك حين تشعر مصر بفقرائها فتأكد أنهم سوف يشعرون بها وبإنتمائهم المفقود لها ,, 

علاء مرجان

 فى 24مايو 2013